అగరువత్తుల అమ్మాయి

అగరువత్తుల పెట్టెలు పట్టుకొని

ఒక చిన్నారి పాప, తన తమ్ముడితో  నా దగ్గరకు వచ్చింది

'రెండుకొంటే ఒకటి ఫ్రీ, తీసుకోండి' అంది

తీసుకొన్నాను

వాటికి అంత పరిమళం ఉండదు

కొన్ని క్షణాలు ఆ చిన్నారులలో వీచే సంతోష పరిమళాలు

నాకు అగరు వాసనల కంటే ఎక్కువ ఇష్టం

పక్కన ఉన్న మిత్రుడు నా తెలివి తక్కువ కొనుగోలును కనుగొన్నాడు

'అవి మంచి వాసన రావు' అన్నాడు

అతనితో అన్నాను

'అంతర్జాతీయ రంగునీళ్ళ వ్యాపారుల దగ్గర కంటే

ఈ పిల్లల దగ్గర మోసపోవటం నాకు తృప్తినిస్తుంది' అని

ఏం చెప్పాలి మరి

'తెలివిగా, నిర్దయగా ఉండటం కంటే

తెలివితక్కువగా, దయగా ఉండటం మంచిది' అంటే 

అతనికి అర్ధమౌతుందా