బివివి ప్రసాద్: గాలి కదిలినా

02 డిసెంబర్ 2017

గాలికి గుమ్మంతెర కదిలినా

చెట్ల ఆకులు జలజలా రాలినట్టు

నువ్వు కవిత్వమై రాలవచ్చు

గాలిలో గాలి మాత్రమే ఉన్నట్టు

శబ్దంలో శబ్దం మాత్రమే ఉన్నట్టు

కదలికలో కదలిక మాత్రమే ఉన్నట్టు

నీలో జీవితం మాత్రమే ఉంటే

గుమ్మంతెర కదిలినా

నువ్వు జీవితమై స్పందించవచ్చు

మరేమీ కాని జీవితానివి మాత్రమే అయినప్పుడు

మరేమీ కాని స్వేచ్చవి మాత్రమే అయినప్పుడు

వెర్రిబాగుల ఆనందానివై మిగిలినప్పుడు

గుమ్మంతెరలా గాలి కదిలినా

నువ్వు బోలెడు ఆశ్చర్యానివి కావచ్చు

క్షణాన్ని చిట్లించుకొని కాంతిలోకి ఎగిరిపోవచ్చు

19.8.2016

_______________________

బివివి ప్రసాద్