'హైకూల' నుండి లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
'హైకూల' నుండి లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

03 మే 2013

కానుకగా బివివి ప్రసాద్ హైకూ సంపుటాలు




'ప్రసాద్ గారి హైకూలని చదివాక కలిగే ఊరటా, ఆహ్లాద భావనా, జాగృతమైనట్లనిపించే సంవేదనాశీలతా అనుభవైకవేద్యాలు. నా ప్రయాణాల్లో, ప్రవాసాల్లో, ఈ హైకూ సంపుటాలను నా దగ్గర ఉంచుకునే వాణ్ణి నేను. ఓ ఒంటరి రాత్రి తటాలున ఏదో ఓ పేజీ తెరిచి, హృదయాన్ని తాకే హైకూలను ఒకటో రెండో చదివి, నిశ్చలత్వాన్నో, సన్నని కదలికనో, ఓ సున్నితమైన స్పందననో అనుభూతిలోకి తెచ్చుకోవటం ఎంత బావుంటుందో!' 
~ పుస్తకం.నెట్‌లో శ్రీనివాస్ వురుపుటూరి   


'ఇక్కడ Dr.K.S Rao గారని Retd. IAS officer గా రొకాయన ఉన్నారు.ఆయన జపాన్‌లో కొంతకాలమున్నారు. హైకూలంటే ఆయనకు ఇష్టం. కొన్నివేల హైకూలు చదివుంటారు. మీ హైకూలు చదివి, 'ఇవి నిజంగా హైకూలు. ఈ మధ్య కొంతమంది రాస్తున్నవి హైకూలు కావు. ఇతను నిజంగా మంచి హైకూలు రాసాడు ' అన్నారు. 
~ ప్రసిద్ధకవి ఇస్మాయిల్‌గారు కవికి రాసిన ఉత్తరం నుండి. 

'ఇవాళ వుదయం లక్ష హడావుడి పనులు ముగించుకుని, ఆఫీసుకు వెళ్ళటానికి తయారై - నాతోపాటు వస్తానన్న స్నేహితురాలికోసం యెదురుచూస్తూ, పెరిగిన బి.పి. తో, పనులు సకాలంలో సక్రమంగా పూర్తికావేమొనన్న ఆందోళనతో వేయి దిగుళ్ళతో, వందభయాలతో సతమతమవుతూ అనుకోకుండా మీ రాలిన పూలను చేతిలోకి తీసుకున్నాను.
ఇపుడు ఈ క్షణాన యెంత నిర్లిప్త ప్రశాంత దు:ఖమో మనసునిండా. దు:ఖం బాధతో కాదు. ఆనందంతోనూ కాదు. యెందుకో నాకు నిజంగా తెలియదు. తెలియాల్సిన అవసరమూ లేదు. ఈ హృదయానుభూతి బాగుంది. ఈ పుస్తకం ప్రతులు ఒక వందకొని నా కోసం పది వుంచుకుని మిగిలినవి నా ప్రియమిత్రులందరికీ కానుకగా యిస్తాను.
ఒక చక్కని చల్లని స్నేహమయమైన పరిసరాలను యెక్కడైనా యెప్పుడైనా మనుషులచుట్టూ సృష్టించగల శక్తి రాలిన మీ కవితా కుసుమాలకు వుంది. మానవులకు సేదదీర్చటానికి పకృతి సమకూర్చిన అపురూపవరాలన్నిటినీ ఒక చిన్ని పుస్తకంలో పేర్చి ప్రకృతిని అనాలోచితంగా, నిర్దయగా, నిర్లజ్జగా ధ్వంస చేసిన మానవజాతికి యెంతో ప్రేమతో యిచ్చారు మీరు.
మీ మనసులో మానవులమీది ప్రేమను అలాగే నిలుపుకోండి. నిలుపుకుంటారు. '
~ ప్రసిద్ధరచయిత్రి ఓల్గాగారు కవికి రాసిన ఉత్తరం.



నా మూడు హైకూ సంపుటుల, హైకూ వ్యాసాల ఈ - పుస్తకం ఆవకాయ.కాం నుండి ఉచితంగా డౌన్ లోడ్ చేసుకోవచ్చును.  ఇక్కడ క్లిక్ చేయండి.

06 అక్టోబర్ 2011

కినిగే.కామ్ లో నా హైకూల పుస్తకం.












నా మూడు హైకూ సంపుటులు, 
హైకూ పై ఇస్మాయిల్, సంజీవదేవ్, 
బివివి ప్రసాద్ వ్యాసాలు, రేడియో ఇంటర్వ్యూ 
అన్నీ కలిపి ఒకే పుస్తకం గా వచ్చాయి.
ఆసక్తి గలవారు చూడండి.

http://kinige.com/kbook.php?id=418




7.5.2013
ఇప్పుడు ఈ పుస్తకం ఆవకాయ.కాం లో ఉచితంగా లభిస్తోంది. లింక్ కోసం ఇక్కడ క్లిక్ చేయండి.

04 అక్టోబర్ 2011

హైకూలు

ఓ సీతాకోక
చుట్టూ చేరాయి
నదీ, పర్వతాలూ

పిట్టలు కూస్తున్నాయి
గాలి నిండా
రంగుల శబ్దాలు

రాయి నాటాను
కొలను కొలనంతా
తామరాకైంది

పొద్దుటి పొగమంచు
మేలుకొన్నట్టు
కలగంటున్నానా

పాట బాగుంది
దూరంనించి వినిపించటం
ఇంకా బాగుంది

చేయి పట్టుకొంది నిద్రలో
పాప కలలోకి
ఎలా వెళ్ళను

వెన్నెల నదిలో
ఒంటరిగా ఈదుతూ
చందమామ

చందమామ
నా బాల్యంలో
చాలా అందంగా ఉండేది

అనాధ బాలిక
జాలి దానం చేసి
వెళ్ళిపోతోంది

ఆటలో ఓడిపోయాను
ఆ పసివాడి
నవ్వు చూడాలని

పంజరం
ఖాళీగా ఉంది
ప్రేమంటే తెలిసిందేమో

నిద్రలో పాపాయి
జో కొడుతున్నాను
నా కోసం

( 'హైకూ' సంపుటి నుండి )

05 సెప్టెంబర్ 2011

హైకూలు


వర్షం
క్షణం పూచే నీటి పూలతో
ఊరు నిండిపోయింది

ఓ క్షణం జీవించాను
అలపై చిట్లిన
వెన్నెలను తాకబోయి

రంగులపిట్ట
మనసు కాన్వాసు పై
రంగులు పులిమేస్తుంది

దూరంగా దీపం
దానిని కాపాడుతూ
అంతులేని చీకటి

పడవ కదలటం లేదు
నీడనైనా తనతో రమ్మని
కాలువ లాగుతోంది
 
(దృశ్యాదృశ్యం  నుండి)