కవిత : నువూ, పిల్లలూ

ఉదయాన పక్షులు 

వాటి శబ్దాలతో సహా వచ్చినట్లు

పిల్లలు వస్తారు నీ జీవితంలోకి

వాళ్ళు నవ్వటం చూసి

మళ్ళీ నవ్వటం నేర్చుకుంటావు

వాళ్ళు ఏడవటం చూసి

మళ్ళీ ఏడవటం కూడా..

నీలోంచి వాళ్ళు 

వాళ్ళ జీవితం ఏరుకొన్నట్లు,

వాళ్ళలోంచి నువు

నీ జీవితం ఏరుకుంటావు

వాళ్ళు ఎగురుతూ, ఎదుగుతారు

వాళ్ళతో ఎగురుతూ, పండుతావు 

సాయం సమయాన పక్షులు

వాటి శబ్దాలతో సహా వెళ్ళినట్లు 

పిల్లలు వెళతారు నీ జీవితంలోంచి

వాళ్ళు నవ్వుతారని నమ్మి, నవ్వుతావు

వాళ్ళు ఏడుస్తారనిపిస్తే, ఏడుపొస్తుంది 

పిల్లలకి నువు చాలా ఇచ్చావు,

నిన్ను కూడా ఇచ్చుకున్నావు

అలా చేసావని అనుకోవు

పిల్లలు నీకు ఒకటే ఇచ్చారు

నిన్ను నువు కోల్పోయి 

మరొకరిలా జీవించే అనుభవం

అలా చేశామని వాళ్ళకి తెలీదు

నీ కాంతులన్నీ వాళ్ళకి అప్పగించి 

నిశ్శబ్దంలోకి వెళిపోతావు చూసావా,

అప్పుడు దైవం అంటారు

నువు పిల్లలని ప్రేమించినట్లే

నేనూ నిన్ను ప్రేమించాను

ఎంతగా ప్రేమించానో 

నాకూ తెలియలేదు, నీకూ తెలియలేదు

బివివి ప్రసాద్

ప్రింట్ లో వస్తుంది..

కొత్త సంపుటి గురించిన పోస్ట్ కి మిత్రుల ప్రేమపూర్వక స్పందనలకు అనేక ధన్యవాదాలు. కొందరు మిత్రులు ప్రింట్ బుక్ ఉండాలన్నారు. ఆ ఆసక్తి రాసేవాళ్ళకి ఉండకుండా పోదు. వ్యయ, ప్రయాసలు పడలేక, మార్కెట్ చేసుకోలేక ప్రింట్ వద్దనుకున్నాను. 

అయితే, బివివి కవిత్వాన్ని ఇష్టపడే యువకవి కట్టా సిద్ధార్థ ( Siddhardha Katta ) ఈ కవిత్వం ప్రింట్ లో తీసుకురావటానికి ఆసక్తి చూపించాడు. కనుక, రాబోయే సంపుటి తను ప్రింట్ చేసి, మార్కెట్ చేస్తాడు.

ఇతర వివరాలు త్వరలో తెలియచేస్తాము.

ధన్యవాదాలు. 

కొత్త సంపుటీ, మరికొన్ని విషయాలూ.. 😊

ఈ నవంబర్ 21 కి నాకు అరవై నిండుతాయి. వేరే సెలబ్రేషన్ ఏమీ అనుకోలేదు గానీ, ఆ సందర్భంగా నా తరువాతి, పదవ కవిత్వ సంపుటి తీసుకురావాలని ఆలోచన. 

నా కవిత్వం కొనేవాళ్ళు పెద్దగా ఉన్నట్లు లేరు. కవిత్వం బాగా రాయటం వేరు, కొనిపించగలగటం వేరు. రెండవ ప్రతిభ నాకు బొత్తిగా లేదని ఇన్నాళ్ళకి జ్ఞానం కలిగింది. :) చాలా అవార్డులు ఎలా వస్తాయో అందరికీ తెలిసిన విషయమే గనుక అవార్డులకు పంపించటం ఇప్పటికే మానేశాను. కనక, ప్రింట్ వేయకుండా, సరాసరి పీడీఎఫ్ రిలీజ్ చేద్దామనుకుంటున్నాను. 

ఆకాశం నుండి సృష్టి వరకూ నాదైన వాక్యంతో ప్రయాణం చేసాను అనుకొంటున్నాను. ఈ సారి వచ్చిన కవిత్వంలో వస్తు, శిల్పాలలో వైవిధ్యం కోసం ప్రయత్నించాను. ఎంత వరకూ ఫలితం సాధించానో, వైవిధ్యం ఎలా ఉన్నా, కవిత్వంగా ఇది ఎలా ఉందో, నా కవిత్వం ఇష్టంగా చదివే మిత్రులు చెప్పాలి. 

ఇప్పటికి డెబ్భై పైగా కవితలు వచ్చాయి ఈ సారి. వీటిలో కొన్ని మరీ వచనానికి దగ్గరగా ఉన్నాయి అనుకున్నవి పరిహరించి, మిగిలినవి పుస్తకంగా తెచ్చే ఆలోచన. కవిత్వం అంటే నా అభిప్రాయంలో నిస్సందేహంగా అనుభూతి లేదా ఉద్వేగం. ఒక ఉదాత్తమైన, కొత్తదైన ఆలోచన తనంత తాను కవిత్వ మవుతుందా అనే సందేహం తొలినాళ్ళ నుండి ఈనాటి వరకూ ఉంటూనే ఉంది. 

కనుకనే, పుస్తకం వేసే ముందు, రాసినవన్నీ వీలైన వరకూ సోషల్ మీడియాలో పంచుకొని, మిత్రుల స్పందనలు గమనిస్తూ ఉంటాను. ఆ స్పందనలు నా తుది కవితల ఎంపికకు సహాయపడతాయని. సంపుటి తెచ్చే ముందు మిత్రులు లేదా పెద్దలు ఎవరితోనైనా కూర్చుని ఎడిట్ చేయటం ఇప్పటి వరకూ ఉన్న అలవాటు. ఈ సారి ఇక ఎవరినీ అడగటం లేదు, అడిగి ఇబ్బంది పెడుతున్నానా అనిపించి. కనుక, ఈ మీడియాలో మిత్రుల స్పందనలే చాలా వరకూ గీటురాయి. 

సహృదయంతో నా కవిత్వం చదువుతున్న, చదివి ఆనందించి ఊరుకోకుండా, ఒక స్పందన లేదా లైక్ తో కవికి, ఒక బాధ్యతగా, ఉత్సాహాన్ని ఇస్తున్న మిత్రులకి మరోసారి అనేక ధన్యవాదాలు. 

బివివి ప్రసాద్

5.11.2026

కవిత : జీవఫలం

లేత యవ్వనంలో, ప్రేమించుకునే రోజుల్లో

తను పలికే ఒక మాట కోసం

మొహంవాచేలా ఎదురుచూసాడు

ఉదయాస్తమయాల్లోకీ,

విశాల మైదానాల్లోకీ, గగనాల్లోకీ చూపులు జొనిపి,

బిడ్డ తల్లిని కావలించుకున్నట్టు

జీవితాన్ని కావలించుకుని

తలదించి, కన్నీరు విడుస్తూ అడిగేవాడు

ఆమెకి నేనంటే ఇష్టమేనా,

ఎందుకని తను ఒక్కమాట కూడా.. 

ఆమె మౌనం అతన్నెంత గాయపరిచిందో 

ఆమెకే కాదు, అతనికీ తెలియలేదు,

జీవితోత్సాహం కోల్పోయినట్లు

ఎందుకంత చేదుగా ఉంటాడో 

అతన్ని గమనించే లోకానికీ తెలియలేదు

కాలాంతరాలలో

ఒక సూర్యాస్తమయం కరుణించి

ఆమెని మరలా చూపినపుడు

ఆమె అంది కదా, 

జీవితం బావుంది,

లోపల కాంతివంతమైన స్థలంలో

నువ్వు అలానే ఉండిపోయావు 

అతనికి జీవితమంతా నింపుకొన్న చేదు 

మెల్లగా కరగటం మొదలైనట్లు తోచింది

అంతలో, ఆమె మరలా అంది, 

నాకు నా జీవితం బావుంది ,

ఇక, నిన్ను పూర్తిగా మరిచిపోవటం మంచిదనిపిస్తుంది

ఆమె ఆలోచనలో న్యాయముంది,

అతనిలో కొనసాగే చేదులోనూ న్యాయముంది

అస్తమయ వర్ణాలు వెలిసి 

మెల్లగా చీకటి కమ్ముతోంది

బివివి ప్రసాద్

కవిత : ప్రకృతిలో

ప్రకృతికి సమీపంలో బ్రతకమన్నారు కదాని

అడవులకు వెళ్ళి, వాటిని పాడు చేయవద్దు

నదులనీ, కొండలనీ కాలుష్యాలతో నింపవద్దు

ప్రకృతిలో భాగంగా బ్రతకమన్నారని 

నది నుండీ, కొండ నుండీ, అడవి నుండీ

కొంత వేరుచేసి నీతో తెచ్చుకోవద్దు

వాటి మానాన వాటిని 

నిలువనీ, ప్రవహించనీ, వికసించనీ 

ఎండనీ, వాననీ, గాలినీ, చీకటినీ 

ఏకాంతాన్నీ, బంధాలనీ, కాలాన్నీ ఆస్వాదించనీ

ప్రకృతికి సమీపంలో బ్రతకటమంటే

బిడ్డకో, తల్లికో, సఖికో సమీపంలో ఉన్నట్లు

ఒక శబ్దానికి సమీపంలో బ్రతికితే చాలు

దృశ్యానికి, స్పర్శకు సమీపంలో నివసిస్తే చాలు

ప్రకృతిలో లీనం కావటమంటే

శబ్దం లోపలికి ప్రవేశించి,

అక్కడి నిశ్శబ్దంలో లీనమైతే చాలు

బివివి ప్రసాద్

ప్రచురణ : తెలుగు వైభవం, నవంబర్ 2026

కవిత : ఆర్తి

నీ పట్ల తను 

వంద పొరపాట్లు చేసి ఉండొచ్చును 

నువు తన పట్ల కూడా..

మీ మధ్య ఆర్తి ఉందో, లేదో ప్రశ్న

మీరిరువురూ ఒకటనిపిస్తుందో, లేదో ముఖ్యం

అవతలి మనిషికి సరే,

నీ కనిపించటం ముఖ్యం,

తను అద్దంలో ప్రతిబింబమని గట్టిగా తోస్తే 

మీరు ఒకటి కాదనిపిస్తే 

వేర్వేరు గ్రహాలకీ, పాలపుంతలకీ చెందినవారు

ఎప్పటికీ ఒకటి కాలేరు,

మీరు ఒకటైతే

ఒకే ఆత్మ ధరించిన రెండు దేహాలు

ఎప్పటికీ విడిపోలేరు 

ఆర్తి లేకుంటే

ఉన్నట్లు నటించి హీనపడవద్దు, 

ఆర్తి ఉంటే

లేనట్లు నటించి గాయపడవద్దు

తను సరే,

ఈ ప్రపంచమూ, నువూ 

ఒకటేనా, వేర్వేరా అన్నది

మరింత ముఖ్యమైన ప్రశ్న

ఇంతా చేసి 

ప్రపంచం మనకన్నా వేరు అనుకోవటం పీడకల

మనతో సహా ఉనికి అంతా 

ఒకటే అనిపించటం మధుర స్వప్నం

నీ కల, నీ ఇష్టం

కేవలం నీ ఇష్టం

బివివి ప్రసాద్