కవిత : వాక్య ప్రవేశం

నీ వాక్యంతో 

సంభాషణ ఎటు మళ్ళిస్తావన్నది ముఖ్యం

తెరవబోయే లేదా మూసే ద్వారాలకి

మన చుట్టూ

నీడ, ఎండ లేదా చీకటి అలానే వుంటాయి 

మనమేం మాట్లాడబోతున్నామో చూస్తూ

జీవితం కూడా చూస్తూనే వుంటుంది

మన పదాలు 

ఎటు మలుపులు తిరుగుతాయోనని

వాటిని బట్టి 

జీవితం తన కాంతిని ప్రవేశపెట్టాలి మరి

వాక్యం అంత ముఖ్యం

వాక్యంతో ప్రవహించే ఉద్వేగం 

అంతకన్నా ముఖ్యం

దాని స్వచ్ఛత, తీవ్రత 

తనని కావలించుకొంటాయా

తన నుండి దూరం జరుపుతాయా అని

ఆతృతగా ఎదురుచూస్తుంది జీవితం

బిడ్డ బాగు కోసం కన్నకడుపు చూసినట్టు

నీ మౌనంతో 

సంభాషణ ఎలా ముగిస్తావన్నదీ ముఖ్యమే

అది చాతనైతే 

జీవితంలో ప్రవేశించటం ఎలానో 

నీకు తెలిసినట్టు

 

బివివి ప్రసాద్

ప్రచురణ : కవిసంధ్య మే - జూన్ 2025