1
గడ్డిపరక
గడ్డిపరకలానే నటిస్తుంది చూడు
నక్షత్రం
నక్షత్రంలా నటించినట్టు
నువు
నీలా నటించడానికి ఏం నొప్పి
2
ఇదంతా
నువు అనుకునేంత అందమైంది కాదు
అనుకునేంత భయావహం కానట్టే
ఊరికే ఉండు
కాలువలో నిశ్శబ్దంగా పారే నీటిలా
3
బతకాలని చూడకు
పోవాలని కూడా
ఉండటమే చాలు
అంతకన్నా నీ నుండి
ఈ గాలి కోరేదేమీ లేదనుకుంటాను
4
మనుషుల్నీ
వాళ్ళ భయాల్నీ , ధైర్యాల్నీ
ప్రేమించు తేలికగా, లేదా పట్టించుకోకు
చిన్నపుడు ఆడి వదిలేసిన బొమ్మలకి
ఏమంత విలువ నివ్వకు
5
ఈ రాత్రి చూడు
ఎంత నల్లగా ఉందో
పగటి తెల్లగా కంటే చిక్కగా, చల్లగా
దీని గర్భం లోనైనా
నువ్వు నువ్వుగా దొరుకుతావా, చూడు
6
ప్రేమించడానికి వచ్చావు
మరే పనికిరాని పనీ పెట్టుకోకు
ఆనందంగానో, గాయపడో
చాతనైనట్టు పాడి, వెళ్ళిపో
పిట్టల్ని చూడు,
వాటి కన్నా జ్ఞానివి కాలేవు
7
ఇదంతా ప్రేమాస్పదం
ఇదంతా నువ్వే గనక
ఇదీ, నువ్వూ కల గనక
పోయేవాటిని ప్రేమించాలి గనక
ఇక వెళ్ళనా, మరి..
రచనాకాలం : 21.7.2023 11.18 రాత్రి
కామెంట్‌లు లేవు:
కామెంట్‌ను పోస్ట్ చేయండి