కానుకగా 'నేనే ఈ క్షణం ' కవిత్వసంపుటి

'నేనే ఈ క్షణం ' నా ఐదవ కవిత్వసంపుటి. నా మొదటి వచనకవిత్వం ఆరాధన . ఆ తరువాత రాసిన మూడు హైకూ సంపుటాలకీ తరువాత వచ్చిన వచనకవిత్వం ఇది. నా మూడు హైకూ సంపుటాలలోనూ హైకూ అభివ్యక్తిలో ఒక క్రమపరిణామం కనిపించినట్టుగానే, నా వచన కవితాభివ్యక్తిలోనూ సంపుటి నుండి సంపుటికి పరిణామం కనిపిస్తుంది. నా అభివ్యక్తిలో వస్తున్న మార్పులను రెండేళ్ళ క్రితం వచ్చిన ఆకాశం లోనూ, ఇప్పుడు రాస్తున్న కవిత్వంలోనూ కూడా చూడవచ్చును .

అయితే హైకూ రాసినా, వచనకవిత్వం రాసినా నా కవిత్వం 'అంతరాంతర జ్యోతిస్సీమల్ని బహిర్గతం ' చెయ్యాలనే ప్రయత్నిస్తూ వస్తున్నాను.

నా కవిత్వం శాంతినిస్తుందనీ, బతికే ధైర్యాన్నిస్తుందనీ, నిర్మల దు:ఖాశృవులతో తమని శుభ్రంచేస్తుందనీ పాఠకులెవరైనా అంటున్నపుడల్లా నా సాధన వృధాకాలేదని అనిపిస్తుంది. ఈ కవిలాగా దు:ఖపడిన మరొక కవి తప్ప, ఈ గాఢమైన శాంతి వెనుక, జీవన్మరణాల సరిహద్దుల్లో పదేపదే ఊగిసలాడిన ఒక సాధారణమానవుని గుర్తుపట్టలేడు. ప్రతిచేదు అనుభవమూ జీవితం ఎంత అందమైనదో, ప్రేమాస్పదమైనదో నేర్పుతూనే ఉంటుంది, బహుశా మనలో ఎక్కడో మన అంతరాత్మని నిష్కపటంగా అనుసరించాలన్న అవ్యాజమైన అనురక్తి ఉంటే.

మీ హృదయాలు గాయపడి ఉంటే, బాధాతప్తమై ఉంటే ఈ కవిత్వం మీకేమి చెబుతుందో ఒకసారి వినండి. కవిత్వమంటే హృదయభాష అని ధృఢంగా నమ్ముతూ, బహిరంతర పోరాటాలతో అలసిన వాళ్ళకోసమే నా కవిత్వం కాని, కేవల వినోదానికి కాదని స్పష్టం చేస్తున్నాను.

'ఆరాధన ' 'నేనే ఈ క్షణం ' సంపుటులు ఆవకాయ.కాం లో ఉచితంగా డౌన్‌లోడ్ చేసుకోవచ్చును. హైకూ, ఆకాశం సంపుటులు కినిగే.కాం లో లభిస్తాయి. కొత్త కవిత్వమంతా నా బ్లాగ్‌లో చూడవచ్చును.

ఇవాళ ప్రకటించిన 'నేనే ఈ క్షణం ' సంపుటికి ఆవకాయ.కాం లింక్ కోసం ఇక్కడ క్లిక్ చేయండి.

30 April 2013

పుస్తకాన్ని ఇక్కడే చదవటానికీ, Scribd సైట్ నుండి డౌన్ లోడ్ చేసుకోవటానికీ క్రింది లింక్ చూడండి.

Nene Ee Kshanam Telugu Poetry by BVV Prasad

వీడియో: కవిసంగమంలో నా కవిత్వపఠనం

ఫేస్‌బుక్‌లో కవిమిత్రులు యాకూబ్ నిర్వహణలో కవిసంగమమనే ఒక గ్రూప్ నడుస్తున్నట్టు వెబ్ ప్రపంచంలోని చాలామంది సాహిత్యమిత్రులకు తెలుసనుకొంటాను. అక్కడ నేను కూడా చాలాకాలంగా నా కవిత్వమూ, కవిత్వం గురించీ, మంచికవిత్వం రాయటంగురించీ నాకు తోచిన మాటలూ కవులూ, సాహిత్యమిత్రులతో పంచుకోవటం జరుగుతూ ఉంది. వేయికిపైగా సభ్యులతో పదుల సంఖ్యలో కొత్తా, పాతా కవుల కవిత్వాలతో నిత్యం కొత్త కవిత్వంతో కళకళలాడుతున్న వేదిక అది. కవిసంగమ మిత్రులు మూడునెలలుగా ఒక కొత్త పద్దతిని కూడా కవిత్వోద్యమంలో భాగంగా నిర్వహించటం మొదలుపెట్టారు. ప్రతినెలా రెండవ శనివారం కొత్తగా కవిత్వం రాస్తున్న ముగ్గురు కవులనీ, వారికి ముందు తరానికి లేదా తరాలకి చెందిన ఇద్దరు కవులనీ పిలిచి వారి కవిత్వం వింటూ, వారి ఆలోచనలూ, అనుభవాలూ తెలుసుకొంటున్నారు. ఈ మార్చి నెల రెండవశనివారం, తొమ్మిదవ తేదీన లామకాన్ సిరీస్ 3లో ప్రసిద్ధకవయిత్రి విమలగారూ, బివివి ప్రసాద్, కొత్తగా కవిత్వం రాస్తున్న కవులు యజ్ఞపాల్‌రాజు, శాంతిశ్రీ, చాంద్ఉస్మాన్ పాల్గొన్నారు. సభ ఆద్యంతం ఆసక్తికరంగా జరిగింది. ప్రసిద్ధ కవులతో పాటు, అనేకమంది సాహిత్యప్రియులు సభకు హాజరయ్యారు. ఇక్కడ కొన్ని ఫొటోలు జత చేస్తున్నాను.

   

నేను కవిత్వం చదివిన వీడియో కోసం ఇక్కడ క్లిక్ చేయండి.

మొత్తం కార్యక్రమం వీడియోనీ, కవిసంగమం ఇతర ప్రోగ్రాముల వీడియోలనీ చూడదలిస్తే ఇక్కడ క్లిక్ చేయండి.

ప్రేమికునికి..

1.

ప్రేమించానని పదేపదే చెప్పకు 

మాటల్ని మాత్రమే జీవించటం నుండి

వాటి మధ్య మేలుకొనే మౌనాన్ని జీవించటంలోకి వెళ్ళినపుడు

ప్రేమ ఒక పదం కాదని తెలుస్తుంది 

రెండు జీవితాలు దేవాలయం వంటి ఒకే మౌనం లోకి ప్రవేశించటం ప్రేమ

2.

ప్రేమించమని పదేపదే అడగకు

తారకలు కాంతిని వెదజల్లినట్లు 

ప్రేమించటమే ఉంటుంది, ప్రేమించబడటం ఉండదు

ప్రేమించటమంటే 

లోపల వెలితి ఉందని భ్రమపడటం  కాదు, వెలితి లేదని కనుగొనటం

ఖాళీగా కనిపించే ఆకాశం నీ హృదయంతో నిండిపోవటం ప్రేమ 

ప్రేమ మేలుకొన్నపుడు, మిత్రుడా, 

ఇవ్వవలసింది ఎంతకీ తరగదు, తీసుకోవలసింది ఏమీ కనిపించదు 

3

ఒక కవిత విను:

పూవుని కోసేవాడికి సౌందర్యాన్ని తాకటం తెలియదు 

సౌందర్యరహస్యం తెలిసినవాడు తానే పూవు అవుతాడు

జీవితాంతం సాధన చేసైనా పూవుని చూడటం నేర్చుకోవాలి 

కడపటి క్షణంలో పూవులా రాలాలి

అవును, ప్రేమ ఒక పుష్పం 

To the lover

Time and again

Do not say

That you fell in love

When you go to live the silence

That woke up in between words

A thought dawns on you-

LOVE is not merely a word

Two lives entering a silence

Reminiscent of a place of worship

Is love

Never beseech any body

To love you

Like twinkling stars at night

Sprinkling light

There can be only a loving-

Being loved never exists

Deluding a deficiency

Is not loving

Loving is to find out

That there is no deficiency

The Heart till now

Looking like empty

Getting filled in

Incessantly is love

When love wakes up

Offering is an unending process

You cannot find any thing

For receiving

Do listen to this poem:

The one who prefer

Plucking a flower

Will never know

How to touch its beauty

The one who know

The secrets of beauty

Will become him-self a flower

Making a relentless pursuit

Through out the life

Do perfect the art

Of looking at a flower

To wither like a flower

In the dying moments

Yes, love is a flower

____________________

ప్రచురణ: నవ్య వీక్లీ 13.3.2013
Transliteration By  Sri T. Chandra Sekhara Reddy

తలుపులు తెరిచి..

1

వెలుతురు కిరణాలని పూలరేకులుగా మలిచి

ఏ నీడలకీ వాడిపోకుండా అరచేతులలో కాపాడుకొన్నట్లు

ఆమెని పెంచారు ఆ అమాయక  ప్రేమికులు ఆమె తల్లిదండ్రులు

మెరిసే కత్తిమొనకీ, మంచుబిందువుకీ భేదం తెలియని ఆమె

భ్రమలు చూపిన చీకటిస్వర్గంలోకి తటాలున జారిపోయింది  

ఆమె తలిదండ్రులని చూసాను

అప్పటినుండీ చూస్తూనే ఉన్నాను

కాంతిలేని చూపులూ, ఉత్సవంలేని నవ్వులూ

ఎవరితో ఏమి మాట్లాడుతున్నా

ఆ మాటలన్నిటి వెనుకా ఆమెకోసం తెంపులేని వెదుకులాటా

ప్రతిదినమూ  తెలియని వెలితిని నింపుకొనే దు:ఖమయ విఫలయత్నమూ

ఇప్పుడు వాళ్ళు మృత్యువు వెనుక నడుస్తుంటే

జీవితం దయగా వాళ్ళని అనుసరిస్తోంది

తమని తాము తప్పించుకొని దాక్కోవాలని

విరామంలేని పనుల్లోకి వాళ్ళని ఒంపుకొంటూనే ఉన్నారు    

ఇవాళ ఎక్కడో పనిచేస్తున్న ఆమెని చూసాను

ఈ పగటి ఎండనిండా దుమ్మూ, జీవనవ్యాకులతల రొదా

పగటిలో సారాన్నీ, తాజాదనాన్నీ పోగొట్టుకొంటూ ఆమె

ఎన్నడూ లేనిది ఆమెపై కాస్తంత దయ కలిగింది

2

ఈ కథ ఏ మలుపులు తిరగనుందో

కథ చివర ఎలాంటి చిరునవ్వులు ఉంటాయో మనకు తెలియదు

కానీ, పిల్లలు గొప్ప స్వర్గాన్ని రుచి చూపిస్తున్నపుడు  

కాస్తంత జాగ్రత్తగా ఉండాలి

గొప్ప నరకం దానిని కాపలా కాస్తుందనే మెలకువ ఉండాలి

లోకంలో బలంగా వేళ్ళూనుకోవద్దు

కాస్తంత తేలికగా నీటిమీద నడిచినట్లు వెళ్ళిపోతూ ఉండాలని    

మిత్రులకి చెప్పే నెపంతో నాకు చెప్పుకొంటాను చాలాసార్లు

పిల్లలు కావచ్చు, ప్రియమైనవి ఏమైనా కావచ్చు

వాటిని రానివ్వటానికి విశాలంగా తెరిచిన తలుపుల్ని

పోనివ్వటానికి కూడా విశాలంగా తెరిచే ఉంచాలనుకొంటాను

బహుశా, సుఖం వాళ్ళు రావటంలోనూ, దు:ఖం వాళ్ళు వెళ్ళటంలోనూ లేవేమో

తలుపులు తెరిస్తే లోనికి వచ్చిన వెలుతురునీ, సుఖాన్నీ  

తలుపులు మూసి దాచుకోవాలని చూస్తున్నామేమో

బహుశా, మనల్ని వెలుతురు కిరణాలుగా మలుచుకొన్న జీవితం

మన అనుమతి లేకుండా తలుపులు తెరిచి

దాచుకోవటమే దు:ఖమనీ, తెరుచుకోవటమే సుఖమనీ మనచెవిలో చెప్పబోతుందేమో    

   

__________________________________

ప్రచురణ: ప్రస్థానం మార్చ్ 2013 ఇక్కడ క్లిక్ చేయండి

6.3.2013