కవిత : నువ్వు నువ్వులా

1

నువ్వు నువ్వులా ఉండగలిగే క్షణాల ముందు

మిగిలిన నీ జీవితమంతా

ఒక గడ్డిపోచ అని తెలుస్తుందా

2

దయ వలనో, దోషాలు ఒప్పుకునే ధైర్యం వలనో

నీ కళ్ళలో నీళ్ళు తిరిగినప్పుడు

నీకు నువ్వు మాత్రమే మిగిలే క్షణాల్లో

ఎంత ప్రీమాస్పదుడిగా ఉంటావో తెలుస్తుందా

3

జీవితం వడ్డించిన విస్తరి కానీ,

ముళ్ళకంపల మీద నడక కానీ

నిటారుగా నిలిచి బలమైన నిట్టూర్పు వదిలినపుడు

ఏయే గగనతలాలకి విస్తరిస్తావో గమనించావా

4

పదేపదే పాడుతున్న పదాల సారం ఒకటే

'ప్రేమించు నువు బతికి ఉండటాన్ని '

ప్రేమించు పంచరంగుల ప్రపంచాన్ని

పచ్చదనంగా పక్వమయే సూర్యకాంతిని

వెన్నెలనీ, వెన్నెలలోని వేదననీ, క్షమనీ, లాలననీ

5

ఏమంత సమయం కాదు

ఇక్కడ నడిచేది, నవ్వేది, ఏడ్చేది

వెళ్ళాక నీ పాదముద్రలు మిగిలేది లేదు

నీ కనికరం నీ సంపద, నీ నింద నీ లేమి

నీ చివరి చిరునవ్వు జీవితానికి ఇచ్చే కానుక

నీ చివరి దిగులు శాపం

6

ఏమంత సమయం లేదు

ఈలోపల ఊరికే ప్రేమించు

లోకం సంగతి లోకం చూసుకుంటుంది

ప్రేమిస్తావా లోకాన్ని దాటి బతుకుతావు

- బివివి ప్రసాద్

22.3.24 11.49PM