కవిత : కొంచెం ప్రేమలోంచి

కొద్దిగా ప్రేమించు

గదిలో వాలిన బంగారు కిరణాన్ని,

కిటికీ బయట తలలూపే పూల మొక్కలని, 

మొక్కలపై కనబడని ఆటలాడే పసిగాలి తరగలని,

గాలికి ఊగే ఆకాశాన్ని,

ఊగే ఆకాశంలాంటి మనసుని,

మనసులో ఊగే జీవితాన్ని

కొద్దిగా ప్రేమించు 

ఇక్కడ ఉండటాన్ని, 

ఒకనాడు ఇక లేకపోవడాన్ని,

నువు లేని కాలంలోంచి నువు రావటాన్ని,

కాలం మళ్ళీ చెరిగిపోవటాన్ని

కొద్దిగా ప్రేమించు,

కొద్దిగా హృదయాన్ని తెరువు,

నీటిబిందువులాంటి హృదయం తెరిచి

జీవితానుభవమనే సముద్రంలో కరుగు

ఇపుడు నువు కదా జీవితానివి 

ఇక దుఃఖం ఎక్కడుంది, భయం ఎటు పోయింది

ఇపుడు నువు ఏకకాలంలో

ఇంద్రధనువువి, దానిలోని రంగురంగుల అణువువి

బివివి ప్రసాద్

ప్రచురణ : తొలివెలుగు 10.5.2026