కవిత : రంగులూ, ఛాయలూ

ఇంటికి రంగులు వేయించాలి

షాపులో కలర్ కార్డులు చూపిస్తారు

మనుషుల మనసుల్లానే

రవంత భేదంలో ఛాయ మార్చుకుంటూ

ఛాయల నుండి లౌక్యంగా రంగులు మార్చుకుంటూ

పదుల, వందల రంగులు

ఏ రంగులకో దగ్గరగా ఉంటావు,

ఏ ఛాయల దగ్గరో నిన్ను పోల్చుకొంటావు

ఒకానొక ఛాయ దగ్గర

ఇదే కావలసిందని ఆగుతావు

అక్కడ నువ్వున్నావు, ఉంటావు

ఇంతకు మునుపూ, ఇప్పుడూ, ఇకముందూ 

ఆ ఛాయ నీ జీవితసారం, 

నీ కలల వ్యాఖ్యానం

ఇంతాచేసి 

నువు రక్త, మాంసాల నుండి పుట్టావా,

రంగుల, ఛాయల నుండి పుట్టావా,

శబ్దాలూ, రాగాల నుండి పుట్టావా,

ఉద్వేగాల కలల నుండి పుట్టావా

ఇంతాచేసి

నువు వాటి నుండి పుట్టావా,

నీలోంచి అవి పుట్టాయా 

నువు కలవా, కలగంటున్నవాడివా,

ఛాయవా, అది పుట్టే కాంతివా

సందేహాల తరువాత

నలుపు, తెలుపు ప్రశ్నల మధ్య

ఏ ఛాయలోనూ ఇమడలేక నిలబడిపోతావు

బివివి ప్రసాద్