27 సెప్టెంబర్ 2020

కవిత : చిన్ని జీవితాన్ని

ఒక చిన్ని జీవితాన్ని జీవించి వెళతావు
కాఫీ రుచిచూసిన దానికన్నా చిన్నది
పక్షి కూత కన్నా, చినుకు రాలటం కన్నా
సూదిమొన కన్నా చిన్న జీవితం

పసిపాప నవ్వుకన్నా తేలికైన జీవితం
ప్రియురాలి చూపుకన్నా హాయిగొలిపే జీవితం

మరణిస్తానన్న భయం తప్ప
నీ జీవితాన్ని పెద్దది చేస్తున్న
విషయమేదీ ఇక్కడ లేదు

మాయమౌతానన్న బెంగ తప్ప
ఈ జీవితాన్ని భారం చేసేంత
సారమేమీ ఇక్కడ లేదు

తెలియకపోవటమనే ఆకాశంలో
తెలియటం ఒక మేఘంలా కదిలి వెళుతుంది
లేకపోవటమనే అనంతంలో
జీవించటం ఒక కలలా కరిగిపోతుంది

పనిలేక గాలికి తిరిగినట్టు
పనిలేక జీవించి వెళ్లిపోవటం బావుంటుంది

ఎందుకు బ్రతికావని
ఎవరూ అడగకూడ దనుకొన్నట్టే
ఎందుకు వెళ్లిపోయావని కూడా
ఎవరూ అడగకూడ దనిపిస్తే
జీవితానికి పరమగౌరవంతో నమస్కరిస్తావు

బహుశా, అప్పుడు
జీవితం కూడా నిన్ను
మహాప్రేమతో గాఢంగా హత్తుకొంటుంది

ప్రచురణ :

వివిధ ఆంధ్రజ్యోతి దినపత్రిక 21.9.20

20 సెప్టెంబర్ 2020

వాన కురిసింది, వీడియో: కొండేపూడి నిర్మల

బివివి ప్రసాద్ 'వాన కురిసింది' కవిత

కొండేపూడి నిర్మల గారి స్వరంలో, దృశ్య సమ్మేళనం తో చూడండి.

ఇక్కడ క్లిక్ చేయండి.

15 సెప్టెంబర్ 2020

సాహిత్య అకాడెమీ 'కవిసంధి'లో..

సాహిత్య అకాడెమీ వారి వెబ్ లైన్ సిరీస్ లో భాగంగా కవిసంధి ప్రోగ్రామ్ లో బివివి ప్రసాద్ కవితాపఠనం వీడియో లింక్ ఇది. 

ఆసక్తి ఉన్నవాళ్లు వినండి. ఇక్కడ క్లిక్ చేయండి 

Please listen to BVV Prasad poetry in Sahitya Akademi Kavisandhi program. Please click here.





21 ఆగస్టు 2020

కవిత : ఇట్టి ప్రేమలు

ఎవరెవరినో ప్రేమిస్తావు

ఎవరెవరినో మోహిస్తావు

కనీసం కామిస్తావు

కారునల్లని మేఘమై కౌగలిస్తావు


నిజానికి ఎదుట ఉన్నది ఎవరో

నీకూ తెలియదు, వారికే తెలియనట్లే


తొలిసారి నీకు నువ్వు

దేహంగా తెలిసావు చూశావా

అప్పుడు విప్పుకొంది ఒక దుఃఖపు వానతెర

కాలం ఇన్నాళ్లుగా తడుపుతోంది నిన్ను


పూవులా కనులు విప్పి లోకాన్ని కన్నవాడివి

మొక్కలా, చెట్టులా ఎదిగి

చివరికి శిలాజంలా మిగులుతావు


ప్రేమలూ, మోహాలూ, వాంఛలూ

నీపై కుదురులేకుండా రంగుల్ని చల్లి వెళ్ళాక

చలించని రాయివై కూర్చుంటావు


ఏమీ ఫరవాలేదు

రాతిపై తేలుతున్న ఆకాశమే

రాయి లోపల కూడా తేలుతుందని

ఊరికే తెలిస్తే చాలు


ఆకాశమే ఆకాశాన్ని

ప్రేమించిందని, మోహించిందని, కామించిందని

కనుగొంటే చాలు


ఊహ ముగిసినట్టు

కల ముగిసినట్టు

కథ కూడా ముగుస్తుంది

కవిత : ఆ!