కవిత : వాంగో

అతనేమిటో తెలీదు ఆ రంగులు చూసే వరకూ,

ముదురు రంగులతో, బలమైన రేఖలతో 

తానేం చెప్పదలిచాడో తెలిసినట్టు తోచింది

అతని కుంచె నుండి ఒలికిన బొమ్మలు చూసాక

వాంగో, నీకు కృతజ్ఞతలు,

జీవితం రంగులకి

కళ్ళని మరింత తెరిచినందుకు

ఇపుడు మరింత విప్పార్చి చూస్తున్నాను,

మేఘాల రంగుల్లో దాగిన హృదయాన్నీ, 

హృదయంలో తెరలెత్తిన మేఘాల రంగుల్నీ 

నువు జీవితాన్నెంత బలంగా ప్రేమించావో

నీకు దశాబ్దాల తర్వాత పుట్టిన 

ఇతను కూడా బహుశా, అంతే బలంగా..,

లేకుంటే నీ రంగుల్లో ఇతనెలా మునిగేవాడు 

వాంగో, ఎప్పుడో వెళిపోయిన సోదరుడా 

మన కోసమే కదా సూర్యుడు కిరణాలు చిమ్మాడు,

భూమిపై గడ్డి మొలకెత్తి, గాలికి ఊగింది,

మనల్ని కలగనటానికే కదా

ఆకాశం భళ్ళున తెరుచుకుంది

బివివి ప్రసాద్