కవిత : చిన్న మెలకువ

పూల మీద

గాలికి ఊగే రంగులు కదిలిస్తాయి;

ఇంత ఆకాశంలో

తేలే రంగులు కదిలించలేనపుడు,

ఇంత జీవితంలో

మునిగే అనుభవాలు తాకలేనపుడు 

పూలలోంచి కదిలింది ఆకాశమేనని,

రంగుల్లో ఊగింది జీవితమేనని 

నీకపుడు తోచకపోవచ్చును

ఇదంతా ఒకటేనని,

కదలాడే నీటిబుడగపై

తిరుగాడే బొమ్మలాంటిది ప్రపంచమని

గుర్తించలేకపోవచ్చును

గాలికి ఊగే రంగులు

నీ చేతన తలుపులు తట్టినపుడు

నీదైన ఏకాంతంలోకి మెలకువ వస్తుంది

ఇదంతా ఒకటో, కాదో చెప్పాలనిపించని 

అనాసక్తతలోకి శాంతిస్తావు

బివివి ప్రసాద్