కవిత : కలలాంటి బంధాలు

కలవటం ఎంతసేపు, విడిపోవటం ఎంతసేపు

చిటికె వేసినట్టు కలవొచ్చు,

పూలు రాలినట్టు విడిపోవచ్చు,

విడిపోవటం భారమా, తేలిక పడటమా

నిజాయితీ కదా వెలగాల్సింది 

బంధంలో, విడివడటంలో,

కలిసి ఉండటమా ముఖ్యం

ఒకరుగా నిండుగా ఉండటం కదా

కాలమింకా చాలా మారాలి

మనం ఎదగాలి, పండాలి,

మరింత కాంతిలోకి వికసించాలి

బ్రతికి ఉండటం కన్నా 

ఏదీ విలువ కాదని తెలియాలి,

తనతో తానుండటం కన్నా 

అపురూప బంధమేదీ లేదని కూడా

మనుషులతో, విలువలతో కాదు

ఊరికే కలిసి ఉండాలి జీవించటంతో

చెట్లు జీవిస్తున్నాయి నీతో కలిసి

నీరు జీవిస్తోంది, గాలి జీవిస్తోంది,

ఆకాశం జీవిస్తోంది, కాలం జీవిస్తోంది

నీవు కలిసిన వారిలోంచి,

విడివడిన వారిలోంచి,

జీవితం తనని తాను జీవిస్తోంది,

కలలాగా నిన్ను తాకుతోంది

బివివి ప్రసాద్