కవిత : నిష్కపట స్వప్నం

ఎవరైనా ఇద్దరు మనుషులు

నిష్కపటంగా ప్రేమించుకోవటం చూస్తే

కనులు చెమ్మగిలుతాయి,

ఎవరైనా నిష్కపటంగా 

ఒక జీవిని ప్రేమించటం చూస్తే

ముఖం ప్రసన్న మవుతుంది,

ఒక జీవి నిష్కపటంగా

జీవనానందంలో మునిగితే

హృదయం సారవంతమౌతుంది,

ఎవరికి ఎవరిపై నైనా

దయ, కృతజ్ఞత, క్షమ కలిగితే

అది చూడటం కోసం పుట్టినట్లు వుంటుంది,

ఆ క్షణంలో, పుట్టుక మూలంలోకి,

భూమిలోకి, తారల్లోకి ప్రయాణించినట్లు,

తెలియరాని సరిహద్దుల 

ఆవలికి విస్తరించినట్లు వుంటుంది

ఉన్నట్లుండి పనులు పక్కన పెట్టేస్తావు,

భయాలు మరిచిపోతావు,

కట్టుబాట్లు గాలికి వదిలేస్తావు,

బాధ్యతల్ని చూసి దయగా నవ్వుతావు

క్షణాల తర్వాత 

విధిగా మర్యాదలు తొడుక్కుంటావు కానీ,

నిర్మలమైన నీ ప్రేమా, 

స్వేచ్ఛా స్వప్నమూ ఫలిస్తున్నాయని

నీ లోపలి 

తరువాతి తరాల మనుషులు గుర్తుపడతారు

బివివి ప్రసాద్