కవిత : ప్రేమిస్తే..

మనుషులు ప్రేమించుకోవాలి పసిపిల్లల్లా

ద్వేషానికి వేయి కారణాలున్నా, 

ప్రేమకి ఒక కారణం చాలదా

ప్రేమిస్తే తేలుతాము, ద్వేషిస్తే మునుగుతాము

చాలదా, ప్రేమలోకి ఎగిరేందుకు

సూర్యుడెలా కాంతి వెదజల్లుతాడు

యుగాలుగా తరగకుండా 

భూమ్మీది చివరి జీవిపై మోహం వల్ల,

తన కాంతిలోని రూపారూపాలలో

తానే ప్రతిఫలించడం వల్ల

ఎలానో బ్రతుకుతాం

బాధల్లో, భయాల్లో, అరుదుగా సంతోషంలో,

నిన్నలో, రేపులో, తటాలున ఇవాళలో,

ఎలానో మరణిస్తాం నవ్వుతూనో, నవ్వలేకనో 

ఏం లేకున్నా ప్రేమిస్తూ వెళతావు చూసావా

తలవంచని గడ్డిపోచవి,

ఏమున్నా ప్రేమించలేకపోతావు చూసావా

కూలిన మహావృక్షానివి

లోకం ఏమిచ్చిందో కాదు, 

నువు ఏమివ్వగలిగావో విషయం కదా

ఉదయపు బంగారురంగు గాలుల్ని చూడు 

గాలుల్లో తేలే శాంతినీ, సౌఖ్యాన్నీ 

నీపై వాలిన ఈగని మృదువుగా విసిరి చూడు,

ఇదే ఈ క్షణాన లోకానికి నువు ఇవ్వగల కానుక

బివివి ప్రసాద్