కవిత : ఫలితం

కొన్ని అక్షరాలని 

చీకటి ఆకాశంలో నక్షత్రాల్లా విరజిమ్మితే 

కొంతసేపటికి గెలాక్సీలుగా మొలకెత్తుతాయా

కొన్ని భయాలని

పరిసరాల్లోకి చీకటిపొగలా పంపిస్తే

కాసేపటికి దయ పాదముద్రలు వినిపిస్తాయా

కొన్ని ఉద్వేగాలని 

జీవితంలోకి వలలా విసిరితే

కొన్నాళ్ళకి బంధాలుగా ఫలిస్తాయా

కొన్ని సందేహాలని 

కాలంలోకి తెరచాపల్లా వదిలితే

ఏదో ఒకనాటికి జవాబుల కాంతుల్ని చేరుతాయా

ఇదంతా ఏమీ కాదు

లేకుండాపోయే చిన్ని ప్రార్థనని 

అనంతంలోకి చేతులు చాచి వినిపిస్తే

ఏనాటికైనా కల చెదిరి స్వస్థత పొందుతావా

బివివి ప్రసాద్

ప్రచురణ : మహా పత్రిక 25.8.25