కవిత : కొంచెం మిగిలినా..

ఈ లోకంలో 

కరుణ మిగిలి ఉన్నందుకు ధన్యవాదాలు

ఉదయపు కిరణాలలో కాంతీ, గాలిలో శాంతీ,

మధ్యాహ్నపు ఎండలో నీడలూ,

సాయంత్రపు దిగుల్లో గగనం నిండా రంగులూ 

మిగిలినందుకు ధన్యవాదాలు

పిల్లలింకా అమాయకంగా 

కన్నార్పక చూస్తున్నందుకు ధన్యవాదాలు

చీకటి మూగిన వేళల 

నింగిలో మూగగా వెలిగే తారలూ,

జీవులు భయంలో మునిగినప్పుడు

కొనవూపిరిలా మెరిసే ఆశలూ,

స్పర్శలో అరుదుగా తాకే ఆర్ద్రతా 

ఈ లోకంలో మిగిలినందుకు ధన్యవాదాలు

కొంచెం ప్రేమ మిగిలినా చాలు,

కఠినమైన చలివేళల ఒక వెచ్చని ఊపిరి చాలు,

ద్వేషాలూ, అపనమ్మకాల మధ్య తడిచూపు చాలు

ఈ లోకం మరిన్ని వేలయేళ్ళు బతుకుతుంది,

ఒక మనిషి మరికొన్ని రోజులు బ్రతుకుతాడు,

నీరెండ మరికొన్ని క్షణాలు 

జీవితాన్ని దీవించి వెళుతుంది

బివివి ప్రసాద్