కవిత : ఇందుకు వస్తారు

కలలు కనటానికి వస్తారు 

కొందరు ఈ మొరటు ప్రపంచంలోకి

పాపం, లోకమేమీ మొరటు కాదు,

సౌకుమార్యంలోకి మేలుకొనేందుకు

తగినంత నిద్రపోతూ వుంది

గూటిలో ముడుచుకున్న గొంగళిపురుగులా

ఎండ కాయటంలోని ఉత్సవ సౌరభం 

లోకం గమనిస్తుంది ఏదో ఒకనాడు,

గాలి వీయటం, చెట్లు చిగురించటం,

స్వచ్ఛ జలాలు సందడిగా పరుగులెత్తటం 

శ్రద్ధగా పరిశీలిస్తుంది

జీవులు ఒకటినొకటి తాకటమూ,

ఒకదాని చూపులోకి మరొకటి 

లాలనగా ప్రవహించటమూ,

ప్రార్థన గాక మరొకటి కాదని

ఎరుకలోకి తెచ్చుకొంటుంది 

స్వర్గం వేరే లేదనీ, 

సంతోషం ముందు కాలంలో దాగి లేదనీ,

ఉన్నాం మనం ఒకరి కొకరమని

తలుచుకోవటం కన్నా

పొందవలసిన అనుభవమేమీ లేదని 

మొరటు ప్రపంచం 

రంగురంగుల రెక్కలతో

నీరెండలో హాయిగా ఎగిరే కాలాన్ని 

ముందుగా సూచించటానికి

జీవితం కలగంటుంది వారిని

బివివి ప్రసాద్