కవిత : ఆటలో పడి..

కుదురుగా ఉన్న సృష్టి 

తనని ఖాళీ అద్దంలో చూసుకుంది,

అందంగా లేననిపించి

ఇద్దరిగా మారింది; ఆమె, అతను

తాను నిండుగా లేననిపించి,

ఒకటి కావాలని చూసింది,

వారి మధ్య ప్రేమగా మారింది

అప్పుడు మొదలుపెట్టింది ఆట

ఇసుకగూడు కట్టడంలో మునిగి

స్థలకాలాలు మరచిపోయిన పిల్లల్లా

ప్రేమలోని అనంతమైన ఛాయల్ని 

ఊహించటంలో మునిగి

బయటికి రాలేదు ఇప్పటికీ

ఎంత నవ్విందో,

ఎన్నింతలు ఏడ్చిందో తెలియదు కానీ,

ఇసుక గూటిని విడిచి

ఇప్పట్లో తాను రావాలనుకున్నా రాలేదు

బివివి ప్రసాద్